仙台雪戰凍僵武里南聯

猪拉多纳

亞冠盃分組賽今晚開波，支持大家重錘仙台維加泰1.91倍「讓球主勝」嘅理由可以好多，但係九叔覺得一個字就夠嘞，就係個凍字，作客嘅泰國球隊武里南聯响冰天雪地嘅仙台，好難唔變雪條，今晚E組首戰九成九任由仙台魚肉。

（now 671台周二晚6:00直播）

仙台維加泰雖然係亞冠盃初哥，不過呢支日職球隊近年脫胎換骨，而且响東日本大地震之後，成班波肩負住一個使命，就係以災區球隊身份向亞洲展示重新振興嘅決心，所以鬥志特別旺盛。
亞冠盃初哥積極增兵

今季仙台為咗應付幾條戰線，羅致咗守衞和田拓也、中場佐佐木勇人、「罰球專家」靴伯特同巴西新援迪奧高，板櫈深度厚咗好多，更有條件踢「全員守備、全員攻擊」嘅整體足球。

老實講，日泰足球水準本身就相差兩班有多，上季泰超排第4嘅武里南聯，係就係有法國前鋒謝高域、泰國國家隊左閘賓馬坦同埋前富山勝利中場平野甲斐呢啲踢得之人，但係講斤両點都比唔上仙台。更重要係泰國球隊有幾何打雪戰吖，仙台今日低到去零下一度，早兩日練波前都要剷雪，武里南聯班人今晚莫講話跑啦，行得郁都算唔錯咯。