切爾達新帥領軍博反彈

猪拉多纳

近年外地足球轉播場數銳減，單係今個周末，我哋就錯過多場激戰，包括昨晨嘅西甲巴斯克打吡，今晚嘅英格蘭聯賽盃決賽，同埋較後時間舉行嘅米蘭及法甲國家打吡，反之今日4場全無話題性嘅西甲賽事都有直播，認真吹脹。

今晚同英格蘭聯賽盃打對台嘅西甲賽事，有切爾達主場對CF格蘭納達嘅護級戰，亦係全日較有睇頭嘅一戰，主隊新帥列仙奴喺上周初接替被炒嘅靴里拉後，今仗將首度領軍，西甲季內有6隊波換帥，效果普遍都立竿見影，所以大家都對列仙奴寄予厚望。事睇上睇番切爾達嘅主場戰績一直唔曳，開季至今只係輸過3仗，更贏過皇家馬德里，若非早前分心西班牙盃，唔會搞到聯賽身陷險境，今仗面對實力唔強嘅CF格蘭納達，係時候開1.75倍主W反彈。（now632台周一凌晨0:00直播）
貝迪斯死火博馬拉加

尾場西甲大戰有貝迪斯主場迎戰馬拉加，客軍今季大縮皮，季中繼續賣走主力填數，表現居然仲可以保持，近5場聯賽保持不敗，鋒將沙奧維拿及伊斯高繼續有貨賣，反觀貝迪斯有首席射手魯賓卡斯度受傷後，火力隨即大減，已經連續4場交白卷，平手盤當然係捧馬拉加。（now632台周一凌晨4:00直播）