柏雷素爾添兵撲殺三箭

猪拉多纳

日本超級盃今日喺東京國立競技場上演，由上季日職王者廣島三箭決戰天皇盃冠軍柏雷素爾，三箭幕後人諗縮數唔開水喉，仲放走埋後防主將森協良太，大軍季前操得太辣，再傷兩件守將，家陣防線天殘地缺，頂唔住柏雷素爾，平手盤撐柏軍！

（周六下午12時35分開賽）

廣島三箭上季創造歷史首度稱霸日職，成功登上世界舞台出戰世冠盃，非常威水。不過，日本國內經濟曳，球會唔敢亂使錢，季前未見重磅收購，仲有防線主力森協良太離隊，實力不進反退。三箭季前辣操谷狀態，點知整傷埋南韓守將黃錫浩同克羅地亞右閘米傑治，後防球員買少見少。射手佐藤壽人上季轟入廿二球成日職神射手，新季繼續喺前面一個打晒，有排佢捱！

另一邊廂柏雷素爾積極招兵買馬，幾個新兵當中以巴西射手基奧最大名，呢個廣州恒大借將曾經喺10至11季度代表塞爾維亞勁旅柏迪遜出戰歐聯，喺分組賽兩度射破阿仙奴大門，級數超班，今季佢將與兩個同鄉李安度杜明基斯及佐治韋拿組成森巴鐵三角，應有一番作為。柏軍近四次鬥三箭贏三場，戰績佔上風，今季人腳更強，平手盤抵玩。