馬得利增程要吼

猪拉多纳

　　剛周日的沙田賽事，三T場次有「非洲之光」、「歡呼星」等冷馬入圍，最終三T正獎冇人中，有225萬多寶撥入下次日賽。至於明晚谷草賽事，三T有423萬多寶，預計派彩有800萬，值得一試。

　　第四場四班1000米，「好利佳」上仗休逾半年復出兼首度在此程上陣，結果仍能追入一席第三；若非此駒入直路時走外叠蝕位極多，隨時已贏馬，改排二檔可順利補中。

　　第五場四班1650米，「馬得利」近兩戰出爭谷草1200米獲冠殿各一，反映窄場性能極出色，上仗排十二檔起步，早段被迫留至近最後位置，但最終能在末段造出全場最快的22.58秒追入殿軍，足見後勁相當犀利。今次增程至一哩，估計更合其後勁發揮，同父馬「勁飛駿」曾於1400米上名，相信牠跑中距離亦冇問題，有望勝回一仗。

　　第六場三班1650米，「智高星」近六仗取得一冠五季，演出準得驚人，前仗贏同程之役以逾兩個馬位彈甩「南陽望族」，姿態輕鬆無比，現評78分應不會有任何阻力，今次換杜利萊操刀力足言勝。向東