學生隊冇鬥心河床贏得

猪拉多纳

打波、打波，既然有個打字，自不然要講決心同鬥心，喺呢方面嚟講，學生隊似乎就差咗啲嘞，今日佢哋响阿甲作客挑戰河床，真係輸少當贏，要博梗係博1.95倍河床主W。

（開賽時間：周一早上午7:15）

睇低學生隊一線，主要因為佢哋開季脫腳，首戰輸畀來訪嘅堤格雷1:3之外，教練基拿賽後居然公開插隊波「態度唔好冇鬥心」，係最令人O嘴嘅。學生隊第一場波踢得唔好，純粹係班球員表現差？咁，基拿突然賭一鋪，用個o靚仔李安納度查拉代替路文馬天尼斯打中場有冇問題呢？好明顯基拿同班球員都有責任，佢狂插隊波，恐怕班人未必忿氣。
河床首戰旗開得勝

相反河床由季前熱身到開咧第一擊，陣容都固定用「3-4-1-2」，除咗中場派施利基安奴代替踎緊波監嘅邦斯奧，其他位置都冇大變動，上場作客貝格拉諾雖然只係贏2:1，演出仲係有板有眼，起碼就唔似得學生隊咁樣，成班人互相埋怨，籠裏雞作反。當然，齋計近6次河床嘅主場對賽戰績，只得1勝2和3負，令人完全唔開胃，但係此一時彼一時，學生隊一開季就家嘈屋閉，好容易畀河床執番劑。