「鳳凰殺手」出招獅吼搶W

猪拉多纳

今輪澳職壓軸戲由布里斯班獅吼主場對威靈頓鳳凰，獅吼啱啱喺亞冠盃附加賽出局，可以疊埋心水全力爭取季後賽席位，加上佢哋有「鳳凰殺手」貝利沙壓陣，2.13倍「讓球主勝」一定要吼實。

（開賽時間︰周日下午2:00）

布里斯班獅吼射手貝利沙近年專恰威靈頓鳳凰，之前5次交手佢就攻入4球咁多。可能佢都知道差唔多又係時候見到鳳凰，所以近兩場聯賽即刻復勇，夾埋攻入3球，今戰火力絕對唔使擔心。再睇埋雙方嘅對賽往績，兩軍歷來一共交手17次，獅吼取得10勝5和2負嘅壓倒性優勢，而且今場波仲有中場梅度卡、守將祖文復出，要贏多次問題唔大。
威靈頓鳳凰作客5連敗

威靈頓鳳凰今季表現持續唔掂，作客5連敗之餘，上兩場仲夾埋失咗12球，咁嘅防守能力真係慘不忍睹，今場仲有入球數目佔全隊一半嘅射手布洛奇停賽，焗住起用侯斯甘斯掛帥，呢位後備箭頭對上一次入波，已經要追溯上年10月，咁今場鳳凰同冇帶武器又有乜分別？仲有呀，外傳主帥歷奇靴拔打算轉用今季只係上陣過一次嘅格連摩斯取代柏斯頓把關，分分鐘自毀長城再大敗一場。