沙士菲搶頭胡

猪拉多纳

阿甲秋明晨開騷

阿根廷甲組秋季聯賽開打，春季冠軍沙士菲首戰作客小阿根廷人，沙士菲成功留住陣中主將，同時由華倫西亞借用星級中場加高，可謂如虎添翼，對住弱旅小阿根廷人有望打響頭炮，一於捧客勝！

（周六早上8時15分開賽、馬會網上文字直播）

沙士菲喺春季賽事表現突出，兩大射手柏拉圖同法古度費雷拉合共轟入廿球，佔球隊近三分二入波，九十後球星法古度費雷拉獨取十三球，拍住紐維爾舊生前鋒伊拿斯奧史高高雙雙成為神射手，佢先後與國際米蘭及熱刺等歐洲球會扯上關係，但會方總算暫時留住呢位主將，有助穩定軍心。與此同時，沙士菲成功引入華倫中場加高，呢位球星名氣響亮，可以帶住班隊友，佢啱啱代表阿根廷踢熱身賽，今戰未必可登場，但長遠計一定幫到班波。
小阿根廷人靠老兵撐場

小阿根廷人隊內最大名氣係後防老將柏拉辛迪，佢全盛時期喺利華古遜都幾醒，但依家已經35歲，攻守同樣不復當年勇。小阿根廷人最大問題係缺少一個高產射手，春季聯賽首席射手馬高斯費古羅亞都係入得四球，真係唔多可靠，今次對住勁旅沙士菲埋門機會唔慌多，睇怕都係冇乜作為。兩軍上季碰頭時，沙士菲喺主場輕鬆大勝三比○，今次主客互調，預期戰果都係一樣，一於撐沙士菲！