博尼日利亞入波先

猪拉多纳

非國盃4強戰殺到埋身

「超霸鷹」尼日利亞喺非國盃嘅表現無可否認係愈嚟愈好，連大熱門科特迪瓦都搞掂埋，更係畀到人無限驚喜，今晚4強遇着體力不繼嘅馬里，場場都先開紀錄嘅佢哋肯定繼續搶韁，尼日利亞「第一隊入球」有1.78倍抵玩。

（now676台周三晚11:00直播）

尼日利亞上場8強對科特迪瓦完全唔輸蝕，仲憑住前鋒艾曼紐艾文歷基罰球得手領先，計埋之前嘅分組賽，4場波都係先入波，條攤路咁靚冇理由唔追啫。再者佢哋有猛將奧古迪刑滿復出，夥拍約翰米基爾逗住中場，實力夠晒保證。再講吖，首席前鋒艾曼紐艾文歷基目前以3球同加納中場梅巴歷克、布基納法索嘅艾蘭查奧爾並列射手榜，但係後者受傷緣盡非國盃，家陣得番梅巴歷克有機會過頭，相信呢位「超霸鷹」射手肯定加多兩錢肉緊爭取入波，務求獨攬神射手寶座。
馬里上場踢足120分鐘

另邊廂嘅馬里雖然淘汰主辦國南非，但係就踢足120分鐘，先靠互射12碼晉級，隊長施度基達、後防科仙尼迪亞華拉同阿達馬古尼巴利幾件主力全部由頭踢到尾，對於三張幾嘢嘅佢哋嚟講，真係極大負荷，今場未必回得切氣，演出隨時走樣，點阻氣勢如虹嘅「超霸鷹」展翅飛入決賽吖！