阿仙奴 史篤城癲鳳鬥狂龍

猪拉多纳

冰封三尺非一日之寒，阿仙奴依家喺英超淪為二線球隊，真係同球會近幾年經營方針有莫大關係。領隊雲格限米煮限飯，想贏波就要靠一班高質鋒將喪攻，可惜班後衞又唔夠班，「賺埋唔夠蝕」，今晚同史篤城對撼，又係有前冇後開大片格局！
老細政策雲格啞忍

自從當年宣布拆高貝利球場，加埋個外國老細入主球會，兵工廠已經變得唯利是圖兼節衣縮食，償還興建新球場嘅債務，雲格惟有啞忍，睇住班球星一個個被賣走，剩係靠班生牯仔，仲邊夠砌吖！

最攞命嘅係兵工廠呢季主場失波數字遠遠多過作客，仲要連續5輪英超都係先失波嗰隊，最終只得1勝3和1負，同曼聯強大嘅逆轉能力根本無得比。依家嚟到二月份生死關頭，英超要力爭上游，仲有足總盃同歐聯戰線，雲格只能夠繼續有前冇後，撞正近排失魂落魄嘅史篤城，癲鳳鬥狂龍，入多幾粒益球迷啦！