史篤城散晒 阿仙奴W大雙投

猪拉多纳

喺主要聯賽生存，難；要爭取佳績，難上加難。細鬼都幾欣賞英超史篤城，佢哋冇錢財冇球星，但就憑不死鬥志，確立自己獨有嘅爛仔形象，由本季初到上年尾賽績都咁一流。但一踏入13年就好似食咗瀉藥咁，點解？大佬，機械人都會攰喇，更何況係血肉之軀？

史篤城今年踢咗7場波，錄得3和4負劣績，最得人驚係勁失14球，其中對勁旅曼城、車路士分別吞3蛋同4蛋，而鬥史雲斯都失3球，對佢哋嚟講並唔尋常。始終史篤城打嚟打去都係得14至15個球員，聯賽、盃賽幾線作戰，真係鐵人都死；加上中型班道「真氣」一洩，就分分鐘嚴重走樣，今輪聯賽作客阿仙奴，形勢肯定惡劣。

阿仙奴近期火氣十足，上場鬥利物浦落後兩球都幾乎反勝，禾確特、普多斯基都弗，最難得係中鋒基奧特都打翻生，所以今場細鬼睇好主W。不過兵工廠後防周時遊魂，史篤城亦有權入波，捧埋大盤就最穩陣。

（有線301及201台周六晚11時直播）