勝利FC悉尼「大」駁火

猪拉多纳

今日澳職上演超級雙城大戰，四支分別來自墨爾本及悉尼嘅球隊互相對壘，率先開波有墨爾本勝利主場對FC悉尼。客軍球星迪比亞路弗到爆，上仗食出大四喜，個人射入四球，帶領球隊大勝威靈頓鳳凰7比1，勒都勒唔住。勝利亦愈戰愈勇，向榜首進發，無懼FC悉尼來犯，似駁火格，大盤必捧。

（有線64及204台周六下午2時30分直播）

迪比亞路早前一度因傷影響發揮，但上仗終於盡顯身價，一人轟入四球，為FC悉尼創下近幾年來最大勝仗，一舉掃走今季戰績低迷頹勢。事實上，FC悉尼近期表現已有明顯改善，加上迪比亞路「神級」演出，進一步振奮軍心，球隊士氣高昂，去到墨爾本亦唔會縮。

勝利走勢亦凌厲，正力追榜首中岸水手，有地利優勢，當然唔會赦FC悉尼。勝利射手馬高洛查士今季已有10球進帳，仲多過迪比亞路，球隊破門本錢充裕，足以同FC悉尼鬥攻。另一場「悉墨戰」，西悉尼流浪者主場對墨爾本雄心，流浪者頻頻奏捷，作客都兩連勝，今仗有地利聲勢更浩大。雄心近七次作客六敗，受讓半一都冇着數，要上盤。