多蒙特撻着弗到冧「紐」

猪拉多纳

德甲獨腳戲多蒙特主場鬥紐倫堡，兩軍實力同狀態都強弱懸殊，多蒙特有力延續歇冬後強勢，1.46倍「讓球主勝」可作過關重心。

（有線64及204台周六凌晨3時30分直播）

多蒙特上仗作客5比0大炒雲達不來梅，眾將弗到爆個個搶韁，踢法機動悅目，姿態清風送爽，踢出佢哋自稱嘅「多蒙特足球」，雖然目前畀榜首拜仁慕尼黑大拋離，但成班球員認為仲有希望創造奇迹，皆因上季已經係後勁王，歇完冬就大爆發，上季首循環多蒙特得分亦只多今季1分，但下半季17場聯賽豪取15勝2和不敗佳績，順利後上封王，如果計上季下半季成績，佢哋攞多拜仁11分，所以目前雖然落後12分，但睇走勢仲未絕望。當然，今季拜仁演出穩定性有大改進，多蒙特逆轉機會較微，但黑柴相信現階段冇乜球隊可以截停佢哋。
紐倫堡新帥亂晒龍

紐倫堡歇冬前痛失主帥，教練赫基畀禾夫斯堡高薪挖走，要由二隊教練韋辛加頂上，佢過去只有帶領第4級別聯賽球隊經驗，上仗首度領軍主場對漢堡已經亂晒龍，竟然將上半季公認球隊最佳球員嘅中場發電機清武弘嗣收起，令球迷嘩然，最終倚靠門柱兩度幫忙至幸保一分，賽後睇見漢堡教頭芬克發晒脾氣，就知大部分時間捱打嘅紐倫堡唔輸已經執到。呢班波目前狀態同士氣都曳，加上近5季作客多蒙特未入過波，近3季合共吞咗8蛋，今晚再訪西法倫球場預咗繼續抬蛋。