布力般玩轉「狼」穴

猪拉多纳

周六凌晨有場英冠獨腳戲，狼隊主場鬥布力般流浪。狼隊敗仗連連後，剛聘唐卡士打領隊桑達斯為帥，此君有heart兼崇尚進攻足球，但球隊剛於盃賽夫添都出局，證明積弱甚深，布力般幾名攻擊手着晒火，受讓平半好路！

（周六凌晨3時45分開賽）
狼隊換帥要時間執

狼隊人腳唔錯，有奇雲杜里等具英超經驗嘅好手坐鎮，但奈何前主帥蘇巴根帶唔掂球隊，已經四連敗，其中三場一球都入唔到，上仗足總盃仲離譜，面對非聯賽球隊盧頓都輸波出局，可謂衰到貼地。

新帥桑達斯於球員時代踢過利物浦，極度注重進攻，本季帶唐卡士打亦非常醒神，目前位處聯賽榜次席。不過佢唔係莫連奴，啱啱上場冇可能即時撥亂反正，尤其對手實力強、狀態好，讓波兇險。

布力般自炒掉貝治後，雖然仲未有新帥上場，但班高質球星除去眼中釘後，踢得非常Sharp醒，其中佐敦洛迪斯、卡森李察士都好弗，已經三連勝兼攻入八球，完全重拾勁旅霸氣。球隊攻守都好過狼隊，去到狼穴都冇有怕，受讓贏埋唔奇。