千杯不醉隔仗再

猪拉多纳

　　谷草A欄賽事，根據我嘅認知，賽道比較平衡，唔係話後上跑法蝕底，放頭又唔係乏利。不過，望真啲，原來近期A欄冇乜大熱門贏過，3期之內只得2匹咁多咋！都咪話唔嚇一跳。上述數字作為參考啦，冇叫大家盡信，但如吼大熱門，自己落注前諗多陣。

　　第三場三班1650米。「勝任有餘」今季大致上表現失色，係跑至上場至有番成績，輸少少畀「千江映月」都冇得好講，當時係咪賺到步速？唔使太介意，總之，佢實實在在贏晒今次同場嘅「邦先生」、「生生不息」、「雪山神駒」等馬，所以，上場入Q水準唔係差。今次預期馬少少場合，步速唔會快，佢有可能繼續賺，或可勝回1仗。

　　第七場三班1000米。「多益善」季初一班此程曾跑得好，該場排12檔又慢閘，但可後上跑入Q，咁都有成績交出，係一時撞棍之作？定係走光？其實唔使點區分，我就覺得係評分着數。而轉馬房後跑咗1場好差好差嘅賽事，未必係新接手倉主嘅問題，可能隻馬未慣，又可能係場地關係。總之，今場重返此程又排好位，再畀機會。

　　第八場二班1800米。「千杯不醉」前仗贏同程時，直路殺上嚟好似飛將軍一樣，上場縮回一哩又出現姍姍來遲鏡頭，係差嗰百幾米就追唔切嘞。今仗等到此程先再跑，對手咪又係一批二班中下級選手，唔應該有好大阻力，有機會食出尾胡。