馬主論戰

猪拉多纳

大東海五班着數

　　李易達剛戰爆咗隻「八飛」，仲幫埋徒弟楊明綸畢業，今晚都要吼住呢個馬房。推介第二場「大東海」，上場初落五班即刻入Q，證明有班利，今次換巫斯義嚟騎，估唔到隔晚都有啲分頭，一於捧場。

　　另外鍾意第六場「勁飛駿」，上場轉賀廐初出，結果輕鬆贏馬，依家肯定仲有分響手。難得贏馬之後，今次可以繼續跑三班賽，仲要比上場孭少一磅，真係着數到暈，連捷在望。

張敬山

玉峽生輝謀添食

　　何澤堯剛啱起孖，今次要繼續捧佢啲馬。推介第七場「高風格」，雖然上場包尾，但季初贏嗰兩場真係好精采，經過一段時間消化評分加幅之後，隨時現真身。

　　另外，尾場「玉峽生輝」都唔可以睇小，上場配李慕華贏得出色，但今次易配何澤堯上陣，亦有磅可減，計落唔係冇連捷機會，排響一檔起步更加係利好條件，有分頭值得捧場。

任達華

旅遊小子打鐵趁熱

　　剛啱葉楚航憑「跑寶貝跑」同「真慷慨」起孖，搏殺手風正順，今晚一於吼實佢啲馬。鍾意第五場「旅遊小子」，上場配戴圖理贏馬姿態確實係輕鬆，今次上番三班未必唔夠爭，有權打鐵趁熱。

　　另外推介第六場「佳同」，上場同「閃耀之星」齊齊彈甩對手，勝後仍可跑三班賽，點計都有着數，應該可以再贏多一場。

寇鴻萍、梁廷鏘