李易達賀壽愛拚者勝

猪拉多纳

尋日係李易達嘅47歲生日，而佢都派咗三隻新勝馬「大鷹勇」、「愛拚者勝」同埋「禮尚往來」出賽，雖然留番喺五班嘅「大鷹勇」唔可以再贏，但今勻升上四班嘅「愛拚者勝」反而再下一城，轉咗去李廐後兩出兩捷，省靚馬房招牌之餘，兼幫倉主贏馬賀壽，可以話雙喜臨門。
       
愛拚者勝（8號）後上險勝。

不過，「愛拚者勝」今鋪贏馬除咗李易達開心之外，連落飛黨都一樣笑到見牙唔見眼，事關呢隻八歲老馬閘前竟然落到得番11倍着啡格，就算Ｑ搭「真慷慨」一樣着啡格，呢鋪落飛黨真係一箸夾中。賽後連李易達都話呢班捧「愛拚者勝」嘅人真係聰明得交關，佢話呢隻馬上次喺五班抽一檔贏，今次升上四班對手唔同，信心真係唔大，之不過今次楊明綸嘅發揮認真一絕，沿途幫隻馬由三疊轉到二疊，拉士又夠耐性等到最後先發力，絕對居功至偉。