馬主論戰

猪拉多纳

勁加勁有分在手

　　何良剛啱憑「蓋世子牙」贏馬，今日呢個馬房都有唔少惡馬，隨時又有頭馬見面。推介第二場「雪蹄靈驥」，上場跑1600米追得唔錯，計馬響五班一定有着數，增程跑1800米更啱發揮，可以贏番一場。

　　另外鍾意第六場「勁加勁」，上季試過放頭同留後都跑得好，四歲馬肯定仲有分在手，雖然一手操開呢隻馬嘅杜利萊停賽，但換勞愛德操刀無損戰鬥力，坐位望贏。

張敬山

綠茵神駒即食

　　計埋剛啱夜賽隻「雪山神駒」，告達理今季每個賽日都有馬贏，手風真係好順，吼實佢啲馬應該冇錯。推介第六場「雙龍出海」，上季跑三班賽都一再接近，依家響四班一定有着數，今季由告達理接手訓練，肯定想盡快交出成績。

　　另外推介第九場「綠茵神駒」，呢隻自購馬台型唔錯，外地六戰取得兩冠一亞一季，其中一場更響三級賽大勝對手，反映級數夠高，有權即食。

任達華

追捧柏寶長勝

　　韋達停賽，柏寶做咗馬迷扶手掍，剛啱即憑「家樂飛」同「按一按」起孖，今日一於再吼佢啲馬。推介第二場「綠駿群英」，上場跑1400米肯定嫌短，輸咗唔使介意，熱完身即刻跑番贏馬路程1800米，用意明顯不過，呢類後勁馬啱晒柏寶騎，贏得。

　　另外鍾意第四場「長勝」，呢隻馬同柏寶好夾，過往人馬先後合作六次，贏過兩場頭馬，另外三次有獎金收，六歲馬隨時可以反彈。

寇鴻萍、梁廷鏘