馬主論戰

猪拉多纳

進勝福星捧得過

　　韋達剛啱憑「好食德」、「友瑩果」同「如願以償」中三元，當中有冷有熱，真係唔到你唔服，今日一於吼住佢嚟買。推介第十場「進勝福星」，季中小休三個幾月之後，近兩場全部入Q，季尾再上陣，明顯想贏番場先唞暑，捧得過。

　　另外，吳嘉晉次次上陣都有馬贏，不妨捧吓第四場「駿方」，季內三戰獲冠季殿各一夠忠心，減十磅對佢幫助好大，坐位望贏。

張敬山

吼蔡廐馬有財運

　　蔡約翰依家落後告東尼八W，要追唔係咁易，但蔡神仙向來能人所不能，今日馬房亦都惡馬盡出，真係未到最後一刻都唔知鹿死誰手。推介第五場「明達」，上場初跑泥地，末段一枝箭咁標上嚟，場地性能一流，今次再跑贏馬路程，連捷冇難度。

　　另外鍾意第九場「財運」，近兩場非冠即亞，三歲馬表現好穩定，增程跑1800米更啱佢嘅均速跑法，坐位望贏。

任達華

揀得準喜遇弱旅

　　告東尼今日出咗16隻馬，睇嚟為咗再做冠軍，已經搏到盡，吼實呢個倉唔會有錯。推介第二場「揀得準」，近四場全部上名，演出夠晒穩定，同場對手實力見得七七八八，隨時畀佢響度執番一場頭馬。

　　另外鍾意第十場「快利多」，前仗響1400米追入第三，末段時間仲快過頭馬「如願以償」，上場轉跑谷草一哩輸咗，唔使太過介懷，回師沙田一定鍊盡。

寇鴻萍、梁廷鏘