阿苗贏馬壯行色

猪拉多纳

英國皇家雅士谷賽期首日嘅皇席錦標，喺禮拜二上演，派咗馬女「金德寶」遠征跑呢場一級賽嘅苗禮德，寧願推遲行程，睇埋尋日香港賽事先至上機，果然心中有馬，苗廐憑住第三場「又贏晒」建功，總算可以壯行色。
       
押後上機心中有馬

「又贏晒」最初由苗禮德訓練，曾經轉去呂廐，但無乜表現，到早排又食回頭草重返苗廐，直至尋日取得久違了嘅頭馬。阿苗話今仗人馬表現都好滿意，楊明綸依足策騎指示，全程守住好位，直路被隔籬嗰隻「大唐勇將」封實，但綸仔都好積極拉出嚟衝，而「又贏晒」就見番昔日嘅鬥心，顯然狀態同自信心都返晒嚟，阿苗相信「又贏晒」上番四班跑，仲有1W喺手。