高清睇跑馬：快樂無窮路有專長

猪拉多纳

　　第五場四班1200米，「快樂無窮」兜了一個大圈，終於認定同程最好，前仗總場次518，此駒舊地重遊終於取得首次上名，該役繼續由卓利執韁，早段留前鬥後走得順暢，轉彎唔走外檔，留在內檔衝刺，可惜步速太慢，就算爆出全場最快末段時間21.73，都係得亞軍。

　　上仗總場次572，牠再戰同程大熱開跑，走位同前仗差不多，因應十一檔起步，早段留喺八、九位，但際遇大不如前，全程三叠，彎位中段更被頂出四叠冇遮檔，難得劣位一樣得手，並跑出1.09.85快時間，可見這場頭馬水準之高，今次續戰同程，連捷非難事。

桂花飄香幕後心急

　　第三場四班1400米，「桂花飄香」短短時間內已用了兩款配備，總場次204佩戴眼罩，總場次455又改戴開縫眼罩，動靜多多，反映幕後心急建功，可惜事與願違，跑落效果一樣欠佳。

　　此駒上仗出戰總場次536田草1400米決定除下配備，表現立刻好轉，前速亦快得多，出閘後守在第四位，沿途走二叠跟住「好精彩」後面，該戰步速好快，第二段做到21.92，所以前面三駒冇好結果，直路潰不成軍，但此駒跟前不單未有腳軟，仲要跑贏再出即勝的「薄荷糖」，爭入一席季軍，睇埋頭馬「勁力」再出超遲望空亦贏，更肯定該戰水平唔差。「桂花飄香」拼後積極備戰，質新馬進步理想，今仗實力馬不多又負輕磅，憑其質素贏馬開齋冇問題。

Sam