湯智傑又爆金財子

猪拉多纳

本地薑湯智傑今季成績麻麻，但間中喺谷草都有佳作，繼上個月爆冷贏咗隻「赤胆雄威」捧盃，尋日喺谷草日賽又炮製冷品，佢嘅坐騎「金財子」喺第三場四班1200米一放到底，爆11倍冷Ｗ，幫小湯攞到今季第5Ｗ，難怪佢過終點後忍唔住振臂高呼慶祝。
       

講開呢隻「金財子」，沈集成就話呢隻馬接手初期腳患好嚴重，好彩馬主高沛團體嘅成員夠耐性，畀足時間等佢搞番掂隻馬嘅健康，成哥話其實「金財子」上鋪跑谷草千二米嘅走勢都唔差，而今次場地偏差更加嚴重，呢隻馬可以貼欄順走賺晒形勢，終於贏馬交代，成哥認為既然幫隻馬搵啱出路，之後都會集中喺呢個路程攻堅。