梁家俊智勝歐洲動力

猪拉多纳

兔年賀歲賽一班洋將大發神威，好似韋達、白德民同埋紀仁安頻頻數胡，直到第九場華將陣營先靠梁家俊嘅「歐洲動力」扳回一仗，爆18倍冷W，依家俊仔累積63W，仲差七場就畢業。
       
歐洲動力馬主及文家良大讚梁家俊（左）發揮一絕。
唯一華將賀歲報捷

講開「歐洲動力」，呢隻馬上鋪喺四班跑千四得第五，今次升番上三班換梁家俊，兼縮番跑千二米即刻建功。賽後文家良大讚俊仔今場夠醒目，事關呢隻馬原本喺「威皇鷹」入面，塞咗好耐，到最後二百米內欄有個空間，俊仔立刻捐入內欄衝，啱啱過到「蜚聲」，完全贏在俊仔夠機靈。
       

文家良仲話「歐洲動力」淡定咗，容易做到留放，日後跑千二、千四仲有機會爭功。