一定爆仲有得贏

魑魅魍魉

東廐「一定爆」尋日響第一場賽事先拔頭籌，不過就唔係好似馬名咁爆冷，以3.8倍次熱門身份勝出，而最高興莫過於馬主何志豪，佢過往養馬一直以「糖果」命名，直至呢匹「一定爆」，先至改埋「一定」系同嗲哋何壽南一樣，就算綵衣亦改用番「一定」系嘅模式，只係將主色由紅色改為深藍色，可見呢位富二代，日後亦會以「一定」系延續家族招牌。
       

對於「一定爆」今場一出即勝，何志豪除咗大讚告東尼練馬功夫好、做足部署外，佢話最主要多謝好朋友郭少明（「締造美麗」馬主），原來呢匹馬過往響澳洲時，正係屬於後者擁有，既然好友中籤，索性成人之美，以友情價轉讓畀佢，所以呢匹「一定爆」尋日贏馬，何志豪兩仔爺亦特登拉埋郭少明齊齊影頭馬相；至於往後部署，何志豪就話一切留番畀告仔揸弗，不過佢自己就好有信心季內應該仲有一至兩Ｗ見面。