高清睇跑馬：森淼獵鷹喜遇弱旅

港陌

　　「精奇」初出跑田草1200米， 走勢有板有眼， 接戰轉爭1400米繼續追得好，於慢步速下追入一席第五，走勢並不簡單。再睇該役前列馬「好得意」、「醒目精英」及「黃金褭蹄」，之後全部有好表現，反映賽事水準之高。

精奇締速犀利

　　上仗總場次308，「精奇」續跑田草1400米，此駒排十三檔起步，採取留前鬥後戰略，但前面的「夢想家」卻搶放想走甩。入直路時，「精奇」仍落後「夢想家」逾十個馬位，然而撻着後走勢卻愈來愈勁，終點前終於追越「夢想家」，以頸位之先壓倒對手贏馬。再睇「精奇」該役末段跑出23.39秒，屬全場之冠，總時間1分22.89秒，只較當日贏二班的「陽明深心」慢一線。今戰「精奇」繼續出戰四班賽惡氣十足，再贏一仗冇難度。

　　另外，「森淼獵鷹」今季首仗跑谷草1650米純粹熱身，接戰縮程跑田草1200米，即取得上名，之後三戰亦例必拼入頭五名，當中先後遇上「旺當家」、「好得意」及「魔幻大師」等惡馬，可算雖敗不辱。

　　上仗總場次279，「森淼獵鷹」續爭田草1400米，換上紀仁安操刀，人強馬壯又排一檔，大熱得手好正路。睇番陣上走勢，此駒出閘後守在內欄靚位，入直路後一度被阻，但過了二百五十米處望空後，即交出強勁走勢贏馬，同場前列馬「漸信良駒」、「皇仁勁駒」及「新領袖」等再出均有好表現，足見水準不低，今仗對手實力平平，連捷可期。

Sam