馬主論戰

猪拉多纳

天久級數高捧盃

　　方嘉柏剛戰中三元兼捧盃，手風大順，今日呢個馬房出馬雖少，但我睇好繼續有馬贏，其中「天久」出爭重頭戲經典一哩賽，呢隻馬試過彈甩「步步穩」贏馬，級數唔講得笑，近兩仗跑1200米明顯嫌短，今次增程跑1600米，頭馬應該手到拿來。另外鍾意第三場「駿方」，上場唞咗年半復出，居然贏到冇對手，鬥心同質素都一流，連捷冇難度。

張敬山

蔡約翰係勁高手

　　大賽日梗係要吼實幾個大倉，其中蔡廐今日出咗成手惡馬，頭馬隨時坐二望三。其中第九場「勁高手」就好值得留意，季內試過同現評102分嘅「曬冷王」串Q，依家評77分跑三班真係着數到暈，縮番嚟跑1800米啱發揮得多，值得捧場。

　　另外重頭戲經典一哩賽，「川河勁駒」雖然蝕分上陣，但近兩場明顯愈跑愈進步，話唔定會有驚喜。

寇鴻萍、梁廷鏘

中國神農加罩搏

　　自從柏寶停賽復出之後，近兩戰全部封王，睇嚟好有決心要收窄同韋達之間嘅頭馬差距，今次吼實佢手馬唔會有錯。先吼實第四場「進取」，上場轉姚廐初出，全程走外叠跑第六，已經試準晒走勢，今次換柏寶操刀，係時候交代。

　　另外鍾意第六場「中國神農」，上場重磅兼遇慢步速，一樣湧上嚟跑第三，今次上班負輕磅仲好跑，初戴眼罩必打硬仗。

任達華