馬主論戰

猪拉多纳

友情友義靠得住

　　葉楚航今晚手馬好惡，我睇好佢有馬贏，最啱心水係第三場「友情友義」，呢隻馬係典型「四班不足、五班有餘」嘅馬，上季一落五班即刻贏馬開齋，但之後上番四班又冇嘢睇。今季跑咗四場輸晒，終減夠分落五班，睇嚟已經到咗出擊時候。

　　另外推介第四場「天賜福星」，跑咗兩場直路賽熱身後，上場轉跑谷草幾乎贏馬，證明窄場啱跑，今次對手唔強，要補中唔難。

張敬山

蔡約翰一路順風

　　剛啱蔡約翰憑「幸運精彩」同「川河勁駒」起孖，搏殺手風好順，今晚馬房只係出三匹馬，但隨時又有頭馬見面。先推介第七場「一路順風」，季內唯一頭馬響谷草取得，之後兩場轉跑泥地同田草，試路程性質居多，今次終於跑番谷草，唔似係陪跑咁簡單。另外鍾意第五場「浦東之威」，上次跑一哩追入第四已試準後勁，今次增程跑1800米更啱跑，開齋在望。

任達華

勁好友q定要捧

　　近期幾位來港客串嘅騎師都朝氣十足，安國倫就係其中之一，今晚佢騎足八場上陣，應該有頭馬見面。鍾意第五場「勁好友」，上場響谷草1800米開齋，鞍上人正係安國倫，證明人馬合拍，今次原庄人馬再跑贏馬路程，排埋一檔起步，隨時可以再贏。

　　另外推介尾場「勝利就手」，上場跑谷草1200米後追有勢，今次抽一檔起步機會大增，係時候敲響勝鼓。

寇鴻萍、梁廷鏘