紀仁安３隻冷Ｐ 眼前一亮

魑魅魍魉

法國靚仔騎師紀仁安初來獻技，雖未至於技驚四座，但尋日嘅表現，已令圈內人士同普羅馬迷眼前一亮，六匹坐騎中，除「勁加勁」落敗之外，其餘五匹坐騎三季一殿及一場第五，睇番「雄獅寶貝」、「金獅駿將」同「真奇寶」三隻下風馬都可以爆冷入圍，絕對係佢嘅騎功搭夠。
       

紀仁安英語不靈光，幸得佢經理人Alexis幫手做翻譯，加上尋日一戰睇過辦，相信呢段客串期應該不愁寂寞。據Alexis表示，其實今次賽前幫紀仁安物色坐騎，多少有啲難度，始終大部分練馬師對騎者認識唔深，首戰客串當然抱住觀望態度，但經過尋日賽事，散場後已有個別外籍練馬師同佢講，稍後會向紀仁安提供坐騎，不過嚟緊呢兩次咁啱係國際賽檔期，相信坐騎唔會太多，但Alexis話會盡最大努力，再同紀仁安響四場國際賽中爭取坐騎上陣，希望再省靚招牌。