馬主論戰

港陌

大智慧增程要捧

　　噚日係阿叻陳百祥60大壽，響度祝佢生日快樂！阿叻噚晚響沙田馬場嘅沙圈擺咗42圍，有大批娛樂圈同馬圈好友到賀，我亦有去賀一賀佢，場面夠晒熱鬧。講番心水，鍾意第二場「加州財子」，呢隻馬型格好靚，我估質素起碼值二班，身處四班着數到暈。另外推介第七場「大智慧」，上場居然先過「電光能源」過終點，增程跑一哩肯定掂，可以捧場。

明海光輝質素高

　　剛啱大摩憑「勁勇士」贏馬捧盃，搏殺手風大順，跑馬最緊要跟紅頂白，今日吼實呢個馬房應該冇錯。最鍾意第四場「明海光輝」，上場初出跑同程幾乎贏馬，質素係點唔使多講，質新馬跑過一場之後，進度只會更好，贏馬補中冇難度。

　　另外第六場「比翼雙飛」都要留意，上場仲響一班跑緊，今場已經置身三班，來港後仲未交代嘅馬，鬥志必堅。

多樂趣有權變身

　　賀賢今日出馬唔多，只係得三駒上陣，但我睇好佢有馬贏。推介第三場「俊威威」，今季初出已經響田草1400米入Q，證明響四班一定夠爭，今次改爭泥地1800米，小心先係箭頭所在。另外頭場「多樂趣」，上季七戰冇表現，今次落五班即強配柏寶，早排試泥閘亦見靚，話唔定可變身。