萬子千紅蔡明紹升格首W

港陌

正所謂「一不離二」，08年最高身價嘅拍賣馬「萬子千紅」，上場由韋達敲響勝鼓後，尋日隻馬升班用番嫡系蔡明紹，又再執多W。
       

無疑韋達幫佢贏馬開竅有功，但蔡明紹呢場錦上添花，亦證明佢嘅功力唔差，最重要仲係師傅告東尼畀足機會，賽前人馬合作七次都未叻過，韋達就騎一次贏一次，蔡明紹呢鋪先至打破僵局，其實亦啱啱係其升格減兩磅嘅首場勝仗，截至昨日，佢出道兩季幾，已經累積至96W，相信好快就會勇闖100W關口。至於「萬子千紅」馬主鄭強輝，今季起孖都唔見佢親自拉頭馬，尋日又係搵佢死黨張宇人議員代勞同領獎，而佢亦大讚蔡明紹悟性高，呢場完全吸收晒韋達上次贏馬嘅跑法，下次再跑，佢話一於建議馬主鄭繼續再撐蔡明紹場！