三獅兵強陣出擊狂噬洪都拉斯

猪拉多纳

英格蘭同洪都拉斯兩路世盃大軍，今晚喺邁阿密完成拍跳後，就會出發遠征巴西。照計兩軍都會派遣強陣出擊，把握機會作最後調整，但相比「三獅軍團」畀領隊鶴臣執到四四正正，洪都拉斯備戰進度明顯遠遜預期，一於捧2.12倍「讓主」。

（TVB302周日凌晨4:45直播）
張伯倫抖2周史達寧停賽

英格蘭以狂風掃落葉大勝秘魯後，上場雖被厄瓜多爾逼和，但領隊鶴臣喺呢場輪換多達10名正選，搵咗菲爾鍾斯夥拍基斯史摩寧踢中堅，同埋由占士米拿出任右閘，試陣味道濃厚。雖然阿歷士張伯倫要抖2星期唔知踢唔踢到世盃，上場食紅牌嘅史達寧今仗亦停賽，不過史杜列治、謝拉特、格連莊臣等主將悉數歸位，要贏波冇難度。

鶴臣對今屆世盃非常認真，英國《每日郵報》話球隊每名國腳都獲派一部iPad，入面記錄晒英格蘭估波做嘅資料搜集。另邊廂嘅洪都拉斯，雖然預計謝利賓特臣、柏拉西奧斯同美羅費古羅亞等骨幹球員都會落場搏殺，弊在佢哋備戰收唔到成效，近兩場搵土耳其同以色列兩支冇份踢決賽周嘅隊伍練兵，最終輸晒不特止，防線更加穿窿勁失6球，班波狀態曳成咁，根本難抵三獅兵進襲。