伍燕梅幸運(4)號

猪拉多纳

「４」呢個冧巴喺中國人社會有不祥之意，但對於「萬事」系馬主伍燕梅嚟講卻係一個幸運號碼。尋日上陣嘅「萬事盛」，對上一場贏馬係四班44分排４檔，今場抽到呢個幸運檔位之餘，另外亦係第四場４號馬，而咁啱伍燕梅馬主牌上冧巴亦係N444號，一樣有三條「４」，最終「萬事盛」嘅蔡明紹胯下勝出第四場四班千二米，似乎真係天注定。
       
萬事盛

蔡明紹上個禮拜沙田日賽未能取得頭馬，兼跑獲五席亞軍，好在尋日及時回順，替「萬事盛」取得補中之外，更替平安夜57歲生日嘅師傅告東尼提早送上頭馬做生日禮物。
       
萬事盛一放到底，告東尼與伍燕梅雀躍興奮。
萬事盛賀告仔生日

穿上一身紅黑服裝入場支持愛駒嘅伍燕梅，高興「萬事盛」今場順利補中，佢話除咗受惠於檔位改善之外，自從早前加戴眼罩之後，走勢明顯成熟得多，預料加分後升上三班，續跑田草千二米有信心可再爭取好成績。