文家良錫晒何澤堯

猪拉多纳

　　文家良馬房上季成績唔算好又唔算差，頭馬數量則減少了，埋單贏唔夠30場，比起再之前三季，梗有30W或及以上，係有啲距離。不過，今季佢重新振作，近期贏馬停不了，目前佔據練馬師榜首位，累積頭馬達13場之多，講到勝出率，比起蔡廐仲要高，認真威水。

　　今季文廐贏馬多，而華將之中，佢最鍾意……應該話最夾，或錫到燶，數到何澤堯，佢地兩個今季合作唔多，數埋唔夠10匹，總成績3冠3亞1第五名，嘩，入Q率高過摩天大廈咁滯。

　　記得早幾年，文家良重用當時仍是見習騎師嘅梁家俊，嗰排真係用親呢位華將，冷又搏，熱又搏，可以知道文家良作風明刀明槍。

　　東成西就內檔演出準

　　今晚文何二人，有兩匹合作，列陣第五場及第七場；「一團威」上次復出，發揮人差馬好，換人一定有變數，老馬等咁耐唔退役，為乜先，梗係想贏番場留為紀念。「東成西就」排內檔演出準，而上場撼得今季長勇「安琛」，對住今場對手，實力佔先。