安國倫留鬚起風雷

猪拉多纳

安國倫今年再度參加一個名為「Movember」嘅澳洲慈善籌款活動，呢個活動嘅男性參加者需要整個十一月都留鬍子，藉此宣揚預防前列腺癌信息。果然善有善報，尋日十一月第一個賽日，蓄起鬍子嘅安國倫頭場就即刻有馬贏，夥拍苗禮德馬房「風雷」勝出呢場只限三歲馬參加嘅四班一千米直路條件賽，更大勝三又四分一馬位返嚟，一吐啱啱周中夜賽兩度獲亞飲恨嘅烏氣。
       
風雷貼外欄一放到底，輕鬆大勝。

「風雷」出自香港拍賣會，身價只係一百八十萬港元，出賽第四次已經開齋得手，苗禮德都戥馬主王定波高興，覓得價格如此相宜嘅佳駟。練者話今場之所以大勝三又四分一馬位，主要係對手太弱，但「風雷」本身有進步，試閘走勢已見好，配合即將四歲，呢匹北半馬將有更佳演出。