千杯豪情又飲勝

猪拉多纳

阿Chris蘇偉賢今季開倉作風急進，尋日又憑「千杯豪情」再下一城，累積第6W，而呢匹薛轉賢廐兩戰兩勝馬，既成為馬房首匹大熱W，同時仲係佢第一匹連捷馬，對阿Chris嚟講有雙重意義。
       
千杯豪情加盟蘇偉賢馬房兩戰兩勝，飛躍進步。
蘇偉賢首匹大熱頭馬

其實阿Chris尋日若果好運啲，新轉倉嘅「新界福星」如非後上影相飲恨，已經爆埋41倍大冷W，可惜未能擸晒兩場五班頭馬。賽後阿Chris就話今季開倉成績出色，可能係因為自己勇於嘗試，尋日兩隻馬突飛猛進表現，都可以話最好例子，當中「千杯豪情」連捷後，下次重返四班跑1400或1600米，阿Chris就話如有好檔位幫助，應該仲會有樂觀贏面。