威風猛將呼聲「高」

猪拉多纳

　　今日沙田馬場舉行十一場草泥地賽事，執筆時正在打風，唔知場地狀況會變成點，馬迷最好先睇清楚情況才落注。高伯新馬房今期只派七駒上陣，數量雖然唔係特別多，但當中亦有好幾匹惡馬，宜加留意。

　　第八場三班草地1800米，高廐替「威風猛將」出王牌報爭此賽。這匹英國自購馬今季遲遲才上陣，但暑期操練正常之餘，又試了兩課大閘先來，可能是高伯新想操足先搏而已。「威風猛將」至今四戰獲兩亞，路程都是田草1800米，看來此駒現階段跑同程最好，所以高伯新不安排牠先跑一仗中短途熱身，直接替牠報爭1800米。

　　「威風猛將」上仗出爭同程配韋達，賽事步速頗慢，但牠仍爆出全場最快末段時間22秒84獲亞，僅以頸位之微輸給賺了步速的「奪金」，足證牠的後勁唔簡單。再看該役同樣以後上跑法追入第六名的「綠色威」，今季再出亦跑獲季軍，由此可見，「威風猛將」上仗並非遇弱旅才入位，今次牠繼續跑1800米，抽排一檔可開齋。(洋超)