紅人莫雷拉殺到捧蜜圈多多利

猪拉多纳

　　準新加坡冠軍騎師莫雷拉殺到，由呢期賽事開始，一直騎到季尾，唔知會唔會似阿巫咁好彩，首日即刻有頭馬接風。

　　呢粒黑珍珠，好多馬迷等到頸都長，大家想再睹佢嘅風采，上季以「魅力星」殺低潘頓「好好機會」嘅片段，仍然歷歷在目，嘩，潘頓鬥後勁，向來唔會畀任何現役騎師身失色，遇到莫雷拉，居然贏唔到，世外高手乎。

　　老老實實，大家睇跑馬多年，彈起過嘅騎師，多到十隻手指數唔晒，邊個唔係人紅贏馬多，分別只係日子長或短，唔通韋達唔係紅人咩？足足在港紅咗十幾年，未來仲有排玩。

　　又例如當日神奇小子，俘虜過幾多幾多馬迷個心，點知再度東來，已經唔係嗰回事。所以，人紅，更要保持策騎水準，贏1場漂亮，9場跑到垃圾不如，咪又係嘥氣。

　　沈苗兩廐最關照

　　莫雷拉今日騎足10場，沈苗兩廐最關照，一於揀來自呢兩個馬房嘅馬，「蜜圈」和「多多利」，上賽走勢已好，得紅人之助，自然有贏面。（Jack）