守齋六個幾月 蘇保羅南莊多寶破悶局

猪拉多纳

練馬師蘇保羅（阿Paul）話晒喺新西蘭曾經都係十一屆冠軍，嚟到香港之後亦都試過做亞軍練馬師，勢估唔到喺過去六個幾月，卻遇上事業低潮之中嘅低潮，自從上季3月27日贏出「喜寶龍威」後，竟然一直食白果，好在尋日第三場，佢終於都憑「南莊多寶」贏馬而回，贏咗今季首W，打破呢個悶局，希望佢可以乘住呢個勢走出低谷啦！
       
南莊多寶輕鬆取勝，衝線時梁家俊相當興奮。

阿Paul賽後表示「南莊多寶」暑期由佢接手之後，已經知呢匹馬嘅質素喺五班超級，上次跑唔出本身水準，係因為全程畀內側「華劍寶」頂住，以致唔能夠貼欄單騎領放，結果放得唔順之下，最後只跑第五。阿Paul指出梁家俊呢場操控步速好出色，贏呢一W鞍上人嘅功勞唔細，佢仲話「南莊多寶」如果次次跑出咁嘅水準，季內再贏肯定無難度。