田泰安揚「威」盃賽

猪拉多纳

　　馬會今季引入南非好手田泰安，真係馬迷、馬主及練馬師最佳禮物，贏吓一場，贏吓又一場，至此累積8場頭馬，穩坐騎師榜第三把交椅，如果佢前面兩位大哥韋達及潘頓，恰一恰眼瞓，排名隨時被踢落嚟。

　　田泰安騎得，谷草走位又醒，攞到好成績唔係幸運，但如果冇十足支持，真係蛇都死，你估佢係第1個騎功了得嘅公司騎師咩？！一定唔係首個，亦唔係最後1個，唔係眾多支持，韋達都唔會有計。

　　贏開一條龍，正好形容依家嘅田泰安，密密贏馬不在話下，仲連續兩期捧盃，田草捧到谷草，左手1隻馬拉華度賽馬會盃，右手1隻美國會所盃，真係手都軟，旺得好緊要。

　　好嘞，呢期大摩彈隻「威爾頓」畀佢騎，1個盃王練馬師，另1個係新晉捧盃騎手，一齊合作實有火花。講到隻馬，上季小試牛刀，跑兩場，得1W1Q，初出已經想揮低「隨心隨意」，反映大摩自信心有幾大，再出即贏係順理成章，試問點會在一班留得耐。另外，同日阿田嘅「驚雷」、「要風得鋒」及「步步友」，同樣係頭馬希望。（Jack）