何良谷戰攻勢勁

猪拉多纳

　　【本報資料】由05/06年馬季開始，何良每季的谷草頭馬數目都比田草及泥地多，如上季其二十五場頭馬中，有十八W於跑馬地馬場取得，另外七場則在田草獲得，泥地賽則一W都冇；由此可見，何廐馬顯然喜於谷草出擊。

　　綻放美麗未止步

　　上季何廐馬贏得最多的路程是谷草1650米，共得十W，當中有五匹頭馬的獨贏賠率達10倍及以上，如19倍「連戰連勝」、17倍「魅力小子」等等。其中「綻放美麗」上季中轉投何廐，並於2月6日初出一役跑谷草四班1650米，最終自造快步速獲季。翌仗增程至谷草1800米，可惜末段力弱只得第五，反映牠是匹正宗一哩馬，難怪再出回師谷草一哩即輕鬆一放到底，蹄下敗將「威駿寶」及「勁飛翔」再出非冠即亞，賽事水準之高不言而喻。

　　儘管「綻放美麗」增至48分後，三戰僅得一席第五，但以其贏馬一役的水準計算，評分不可能就此止步，這匹五歲馬現評47分，相信必有頭馬在手。

　　騎練合作方面，何廐上季的頭馬由十一名騎師取得，而練者最信任的應是其徒弟蘇狄雄；兩人上季合作一百四十二次，結果交出六冠四亞九季，特別是當中有四W於四班賽取得，日後宜多加留意。