容天鵬不會捱打

猪拉多纳

　　容天鵬今季開倉立萬，已經接收了唔少馬匹，截至目前為止共有五十匹，高分馬唔多好正常，因為畀BIG 4嘜住一大堆，好難會跳槽，但有好多可以畀佢發揮實力。

　　咩叫做「畀佢發揮」？就係好多來投馬上季成績平平，數一數至少有二十駒以上，呢類馬上季跑親都輸，可能係傷病問題，又有可能係冇乜料子，不過，輸完有分減，漸漸落到反彈位亦唔定。

　　如果係冇料嗰類，減分毫無意義。假如係因傷跑唔出水準，又或者係上季狀態低潮嗰類馬，只要容天鵬搞得掂，撚好嗰批馬，必有宣傳之效，話唔定到時會有更多馬來投。

　　所以，初步睇呢個馬房的兵力，開倉首季應該唔會捱打，當然一切要視乎倉主功力及部署。