軍士換配件又掂

猪拉多纳

曾幾何時，「軍」系大馬主郭浩一直好撐王志偉，可惜今季偉仔已經唔係呢系馬嘅必然配搭。「軍刀」季內三Ｗ，加埋尋日頭場爆冷嘅團體馬「軍士」，統統無佢份，想續牌都危危乎。
       
軍士初戴開縫眼罩即刻回復表現，險勝對手先拔頭籌。

其實，郭浩唔係無畀機會王志偉，之前「悅璐孖寶」有心造就，可惜騎者又失諸交臂。至於尋日隻「軍士」，季內仲未贏過，賀賢換上華將大阿哥鄭雨滇都係盡力而為，點知飛起偉仔就即刻敲響勝鼓，都咪話唔邪。聽賀賢講番，「軍士」今季表現反覆咗，不過呢匹老馬有個特性，就係每次轉換配件嗰一場，例必有好成績，今場加戴開縫眼罩上陣，又回復水準。
       
郭浩掌舵的「軍」系陣營，今季取得美滿成績。

王志偉尋日都算黑仔，「軍士」贏馬無佢份，出策東廐兩駒「威利猛男」同「順利得勝」都係跑第二，只能嘆句運氣不如人！