烏拉圭夫添主場爆法

猪拉多纳

今晚上演一場重量級熱身賽，即將參加洲際國家盃嘅南美洲代表烏拉圭，喺主場搵嚟歐洲勁旅法國拍跳。

今次烏軍備戰十分認真，唔單止有「三叉戟」卡雲尼、蘇亞雷斯及科蘭壓陣，亦徵召咗加斯頓拉美利斯、高甸、馬田卡沙利斯等外流猛將，其中「哨牙蘇」因咬人事件，被英足總罰停賽十場，最近佢竟然批評英國首相卡梅倫唔理民生，激嬲埋一班利記粉絲燒佢波衫添，擺明係博走喇！加上佢餓波已久叉足電，仲唔趁國際賽場合有得落場，搏命騷吓哥利畀班買家睇咩。

相反，法國今輪國際賽周只需應付兩場熱身賽，難免戰意一般，況且拜仁「國王」列貝利獲准休息，皇馬中堅華拉尼亦因傷倦勤，攻守受削，面對強陣出擊嘅烏拉圭，斯維估計法國都係陪太子讀書，主勝有買趁早。

（周四凌晨3時開賽）