英冠附加賽14億終極戰

猪拉多纳

水晶宮殘陣撐屈福特

英冠附加賽「1.2億鎊決賽」今晚勁爆上演，水晶宮喺溫布萊球場對屈福特，受讓平半都咪掂，因為水晶宮王牌射手格連梅利唔踢得，救世主韋費特沙夏又要帶傷上陣，行衰運隨時熄火，不如博蘇拿帶隊幫屈福特升班好過，「屈仔」讓平半，捧1.95倍上盤！

（廣東體育周一晚10:00直播）
屈仔領隊蘇拿靠得住

水晶宮喺4強兩回合計以2:0淘汰白禮頓，可惜今季攻入30個聯賽入球嘅格連梅利無喇喇重傷，今仗肯定缺陣，另一位前鋒史堤芬杜比又借用期滿走咗，打亂晒部署。最慘係被曼聯收購後以借用身份留隊嘅韋費特沙夏，上仗比賽途中扭傷足踝，頂硬上踢足90分鐘，今晚又話要紮住上，佢仲可唔可以好似上場咁梅開二度？唔樂觀囉！

對家屈福特領隊蘇拿曾經自爆，執教期間拒絕過英超球隊邀請，犧牲咁大，無非都係想帶領「屈仔」升上英超啫。上圈屈福特兩回合計以3:2砌低李斯特城，狀態唔錯，近期傷兵問題亦已好轉，靠得住o架！英國傳媒粗略估計，呢場決賽嘅勝方來季升上英超，就會有大約1.2億鎊（約14億港元）嘅潛在收入，條數咁大，戰果應該會正路好多，一於信蘇拿，撐上盤！