鳥棲1.6倍W遇神殺「神」

猪拉多纳

係人都知日職球隊好識搞promotion，鳥棲砂岩就係其中一隊，但係無論你搞幾多花臣做宣傳，至緊要仲係隊波成績要好，先至留得住啲Fans，今日鳥棲响日聯盃主場對大分三神，就係終止3連敗嘅好機會，1.6倍主勝博得過。

（開賽時間：周三晚6:00）
三神護級至上試陣味濃

鳥棲今季戰績麻麻，不過推廣手法就出神入化，用實物原大球員展板畀Fans影相，只係行貨，早排直情喺佐賀縣個主場外面，搞咗個流動動物園，羊駝、鸚鵡、鬣蜥、兔仔都有，認真別開生面。但講到成績鳥棲就唔多掂，近排唔只連輸3場，上場聯賽仲畀浦和炒鋪6:2，一直博入國家隊嘅前鋒豐田陽平，直情喺專程入場嘅日本主帥沙哲朗尼面前出晒醜，為咗挽回面子，今日應該唔敢放鬆，係時候反彈贏番場。

大分仲慘，開季咁耐到上星期六至响聯賽開齋，3:2贏新潟天鵝。大家咪以為佢哋從此改運，因為大分有後衞高木和道、深谷友基、辻尾真二同松本怜打柴，監督田坂和昭近期焗住試用二線球員，戰鬥力冇乜保證。由於呢場只係日聯盃，一心聯賽護級嘅大分，九成九會繼續試陣，隨時又會好似月初雙方喺聯賽對碰嗰次咁（大分輸2:4），畀鳥棲打爆。
日聯盃賽制

14支球隊分成2組，每組7隊分別進行單循環賽事，每組首、次名隊伍將會連同仙台維加泰、浦和紅鑽、柏雷素爾及廣島三箭4隊，進身8強。