愛華頓「大」騷歡送莫帥

猪拉多纳

費爵爺退休，大家都喺facebook瘋狂洗版，異口同聲唱「唯獨你一個是不可給取替……」到之後證實接替費Sir嘅係愛華頓領隊莫耶斯，搞到一眾魔躉都好擔心，究竟未捧過盃嘅莫帥，有冇能力帶領紅魔再創高峰呢？點都好，下季嘅事下季先再算，今晚「拖肥糖」喺主場對韋斯咸，班球員肯定會加多兩錢肉緊，踢番場好波等莫耶斯有個美好回憶！
近6次鬥韋斯咸5鋪開大

講起莫耶斯過檔曼聯，依家同時傳得最勁嘅，自然係愛華頓雙星費蘭尼同巴尼斯跟埋恩師「入魔」啦，如果係真嘅話，呢兩位球員在公在私都肯定格外努力，以求顯身價同曼聯講數，可以爭取到一份肥約。有呢兩位後上王賣命，配合陣中幾個射得之人，好似謝拉域、米拿拉斯同安尼捷比等，今晚要入番幾粒向莫耶斯送行又有幾難先？

韋斯咸呢邊，依家排緊第10位，高不成低不就，嚟緊例行公事冇乜壓力，肯定唔會死守，入波同失波都應該都唔會少。小妹仲收到風，「錘仔幫」件借將前鋒安祖卡路爾想下季留隊，今晚一定要盡情「騷哥利」，睇埋佢哋兩班波近6次交手有5次開入球大，有個咁筍嘅靚績，一於追多鋪1.7倍「大」啦！
推介：愛華頓（大）

戰勝貓cafe

繼之前做過足球、飲食同動漫主持後，小妹今次有幸參與日本文化執事節目，喺一間有7隻貓嘅cafe度拍嘢，經過4粒鐘後，我終於成功克服「恐貓症」，仲可以抱住佢哋嚟玩添。想睇我喺鏡頭前處變不驚嘅樣，記住留意我fb啦！