梁定華400W共創良機

猪拉多纳

尋日主席賽馬日頭兩場嘅「奇無極」和「共創良機」，分別幫本地薑鄭雨滇同埋即將退休嘅梁定華贏到個人第400場頭馬，而呢個400W孖寶就派$135，出現輕微蝕水，莫非有人未卜先知佢兩個尋日會齊齊達成四百W大關？
       
共創良機（12號）短頭擊退愛將，人馬發揮一絕。
全日出兩隻贏晒

講開「共創良機」，都應該係最後一年從練嘅梁定華代表作，事關今鋪升班轉跑田草千二米一樣照贏，勝出季內第四W，就連華哥賽後都講笑話「共創良機」第四場頭馬就係佢第400W，零舍有意義。尋日着住紅色戰衣嘅華哥大讚功臣霍勵賢發揮一絕，假以時日一定獨當一面。第三場華哥同霍勵賢靠「大地王者」再下一城，全日出兩隻贏晒，而此兩駒亦繼上月尾谷戰後再次同日勝出。