磐田收Order「大」鬧東京

猪拉多纳

日職同日乙今日開快車，揀咗（一）8嘅FC東京主場對磐田山葉畀大家，入球大記得吼到實，事關磐田剛啱炒咗教練森下仁志，依家要由助教長澤徹頂檔領軍，據聞高層已經落柯打要提升入球數字，隨時「大」翻身開入球騷。

（開賽時間：周一下午2:00）

開季咁耐，磐田比較叻係日聯盃贏過3場，弊在日前作客以1:2不敵新升班嘅甲府風林，聯賽9場得1勝2和6負深陷降班區域，令到教練森下仁志即刻冇得撈，高層要撳緊急掣安排助教長澤徹執住手尾先，避免炒得太遲斷送護級希望，然後同前國腳名波浩傾偈搵佢揸旗，都咪話唔閉翳。
東京前鋒輸流爆發

聽講，磐田高層見隊波今季火力嚴重下降，曾經連續兩季成為日職神射手嘅前田遼一完全冇料到，打算搵出名鍾意喪攻足球，帶領過川崎前鋒同日本奧運隊嘅關塚隆領軍，既然高層嘅態度咁明顯，長澤徹梗係要滿足要求，吩咐球員搶攻啦！

另一方面，FC東京嘅傷兵問題已明顯好轉，前鋒盧卡斯施維連奴同射手渡邊千真，近排更輪流爆發，搞到由英超回歸日職嘅修咸頓借將李忠成都要做後備，趁住磐田炒教練立立亂又唔敢守，今場雙方駁火好容易入波，入球大抵玩呀！

猪拉多纳