巴塞輸波贏風度

猪拉多纳

西甲兩豪門球隊皇馬同巴塞，各喺歐聯食咗德甲球隊悶棍，雖然呢兩支頂級勁旅表現令捧場客失望，但Peter都要畀個like佢哋。因為雙方球員都接受失敗現實，亦冇喺球場打茅波瘋狂踢人洩憤。尤其係巴塞，佢哋冇為輸波搵藉口，仲讚拜仁係真正冠軍；所謂勝不驕敗不餒，良好體育精神好值得大家學習。Peter都想讚埋巴塞球迷，佢哋冇狂噓所支持嘅球隊，亦冇提早離場以示抗議，球迷對愛隊不離不棄令人感動。
多蒙特骨幹離隊大鑊

講番兩支德甲球隊，拜仁今季強勢而臨，相信會吸引到更多球迷。實在拜仁財雄勢大，幕後班智囊夠猛料，想唔勁都幾難。拜仁比西甲兩強優勝嘅地方係夠全面瓣瓣有，高波地波要攻要守都考佢哋唔到，整體合作性又高，睇嚟班波仲有排威。相反多蒙特就有保留，盛傳「羅拔仔」及教練高普隨時轉會，馬里奧葛斯又將轉投拜仁，三位骨幹如悉數離開，對於多蒙特會有好大打擊。
金句：德甲雙雄前途有「二」，西甲兩強精神可嘉