黑貓下盤發維

猪拉多纳

迪肯尼奧激活 戰意爆燈

連攞6分後，你以為迪肯尼奧會縮？好難喇！英超爆發護級大戰，阿士東維拉主場惡鬥新特蘭，迪帥激活「黑貓」變「血性戰虎」，執教三場都有波入，氣勢超勁受讓平半好路；維拉有艾邦拉荷打番生，鬥攻下要埋大盤！

（有線300及200台周二凌晨3時直播）

「黑貓」季尾愈踢愈沉，管理層決定賭一鋪，邀來「癲佬」迪肯尼奧帶隊。迪帥無疑唔夠經驗，戰術運用亦唔見得高明；但於護級存亡之秋，新特蘭最需要係士氣，迪肯尼奧憑其個人魅力同魄力，即時為「病貓」注入生氣，短短日子就激起戰將超強鬥志。處子戰「黑貓」同車路士鬥攻，雖然輸波卻打出拚勁；次仗作客紐卡素，轟入三個世界波贏得清脆；上仗鬥愛華頓，技術雖不足但鬥心搭夠，於劣勢下小勝。

迪帥性格充滿激情，好快就征服「黑貓」球員同球迷，古拿、卡達莫都先後話願意為迪帥賣命。

新特蘭兩連勝後，已甩開護級區域5分，但迪帥賽前依然瘋狂催谷班波，叫球員當今場係歐聯決賽咁打，仲誇下海口話，若護級成功，自己唔識游水都照跳落海，今場「黑貓」不但唔會hea踢，更一定搶錢咁搶。事實上，迪肯尼奧今季已同維拉交過手，舊年10月佢帶領甲組史雲頓，於英聯盃主場惡鬥維拉，只係於完場前失波僅輸2比3，揸隊甲組仔都幾乎唔使輸，「黑貓」氣勢咁勁贏埋都仲得，受讓平半好筍。
維拉夠機動吼埋大

「黑貓」踢法極其進取，今仗有巴士利同格力加特拿復出，兩閘係咁谷上，後防難免露出空位。維拉打法亦夠機動，艾邦拉荷、尼索比亞同安祖斯韋文都快到嘔，今場分分鐘搵到着數，加上王牌射手賓迪基腳風順，維拉要入波唔難，大盤都要(目及)實！