|
|
今屆西甲唔經唔覺進入尾聲，要數最令人驚喜嘅兩支球隊，一定係仲有機會爭歐洲賽資格嘅皇家蘇斯達同貝迪斯。兩支球隊今季同樣喺主場成功「打老虎」，將巴塞隆拿或皇家馬德里擊敗。當中貝迪斯最值得人欣賞嘅地方係班波好有球味，娛樂性豐富，好似上周喺地區打吡大戰落後西維爾3球之下扳平，刺激度爆燈。
貝迪斯今晚對住皇馬，有後防主力拿祖傷愈，令陣容更加完整，而且哥倫比亞前鋒杜蘭柏邦上周又取得入球，目前已累積5球進帳、交出3次助攻，成為貝迪斯歷嚟第2出色嘅冬季轉會收購，肯定會對「銀河艦隊」後防造成極大困擾。
皇馬方面，除咗有歐聯作客多蒙特嘅後顧之憂外，今仗仲有沙比阿朗素停賽，艾辛又有傷令中場截擊力大減，而且連沙治奧拉莫斯、基迪拉都收起。不過值得慶幸係，隨住迪亞高洛迪古斯充滿說服力嘅撲救演出，令莫連奴同卡斯拿斯之間角力佔盡上風，亦畀外界一個重要訊息，就係皇馬冇咗「聖卡斯」唔係唔得。
再者，皇馬今季响巴拿貝更場場有波入，而喺莫帥呢3年領軍下，聯賽夾埋就攻入303球，比迪保斯基執教嗰陣嘅「銀河艦隊」火力更強，相信今仗兩隊肯定會有一番惡鬥，大家等睇好戲啦！（now632台周日凌晨0:00直播） |
|
金睛卡
发表于 2013-4-20 11:21
变色卡
显身卡